پاکستانی فری لانسرز نے مالی سال 26-2025 میں ریکارڈ 1 ارب 76 کروڑ ڈالر زرمبادلہ کمالیا

پاکستانی فری لانسرز نے ملکی ڈیجیٹل اکانومی میں ایک نیا تاریخی سنگ میل عبور کرتے ہوئے کمائی کے تمام پچھلے ریکارڈ توڑ دیے ہیں۔ سرکاری اعداد و شمار کے مطابق، فری لانسرز نے مالی سال 2025-26 میں ریکارڈ 1 ارب 76 کروڑ ڈالرز کا زرمبادلہ پاکستان منتقل کیا ہے، جو کہ گزشتہ مالی سال کے مقابلے میں ان کی برآمدی آمدن میں 78 فیصد کا شاندار اضافہ ظاہر کرتا ہے۔ ڈیٹا کے مطابق صرف جون 2026 میں فری لانسرز کی ایکسپورٹ ارننگ 16 کروڑ 40 لاکھ ڈالرز رہی، جس میں سالانہ بنیادوں پر 69 فیصد اضافہ ریکارڈ کیا گیا۔

ملک میں فری لانسنگ کے شعبے میں مسلسل اور تیزی سے ترقی دیکھی جا رہی ہے۔ اگر ماضی کے اعداد و شمار پر نظر ڈالی جائے تو مالی سال 2022-23 میں فری لانسرز کی برآمدی آمدن 36 کروڑ 40 لاکھ ڈالرز تھی، جو مالی سال 2023-24 میں بڑھ کر 50 کروڑ 50 لاکھ ڈالرز اور مالی سال 2024-25 میں 98 کروڑ 50 لاکھ ڈالرز تک پہنچ گئی تھی۔ اب موجودہ مالی سال میں 1.76 ارب ڈالرز کا ہدف حاصل کرنا ملکی معیشت اور آئی ٹی سیکٹر کے لیے ایک بہت بڑی کامیابی ہے۔