محسن نقوی کا بوئنگ ہیڈکوارٹرز کا دورہ، پی آئی اے کیلئے 16 نئے طیاروں پر پیش رفت

وفاقی وزیرِ داخلہ محسن نقوی نے واشنگٹن میں ہوا بازی کی دنیا کی معروف کمپنی “بوئنگ” کے ہیڈ کوارٹرز کا اہم دورہ کیا ہے، جہاں پی آئی اے کی نئی مینجمنٹ کا اعلیٰ سطحی وفد بھی ان کے ہمراہ تھا۔ دورے کے دوران محسن نقوی نے بوئنگ گلوبل کے صدر برینڈن نیلسن سے خصوصی ملاقات کی، جس میں پاکستان انٹرنیشنل ایئر لائنز (PIA) کے لیے 16 نئے طیاروں کی خریداری سے متعلق اہم ترین پیش رفت سامنے آئی ہے۔ ملاقات میں پی آئی اے کے فضائی بیڑے کو جدید بنانے کے لیے طیاروں کی خریداری کے بہترین تکنیکی اور مالیاتی آپشنز پر تفصیلی تبادلۂ خیال کیا گیا، اور ایک بہترین تجارتی ڈیل کو جلد از جلد حتمی شکل دینے پر اتفاق کیا گیا۔ وفاقی وزیرِ داخلہ نے طیارہ سازی کی صنعت میں بوئنگ کے عالمی کردار کو سراہا اور پی آئی اے کی ضروریات کو ترجیحی بنیادوں پر پورا کرنے کی یقین دہانی پر بوئنگ گلوبل کے صدر کا شکریہ ادا کیا۔