پالتو جانوروں کی تعداد بچوں سے زیادہ، کمپنیاں ڈائپرز بنانے لگیں

مشرقی ایشیائی ملک جاپان میں گرتی ہوئی شرحِ پیدائش کے باعث ایک حیران کن اور انوکھا معاشرتی رجحان سامنے آیا ہے، جہاں اب پالتو جانوروں کی کل تعداد ملک میں موجود بچوں کی مجموعی تعداد سے بھی تجاوز کر گئی ہے۔ غیر ملکی میڈیا رپورٹ کے مطابق، شرحِ پیدائش میں مسلسل کمی کے باعث بچوں کی مصنوعات بنانے والی معروف کمپنیاں اب مالیاتی بقا کے لیے پالتو جانوروں کی مارکیٹ کا رخ کر رہی ہیں اور بچوں کے بجائے کتوں اور بلیوں کے لیے خوراک اور ڈائپرز بڑے پیمانے پر تیار کر رہی ہیں۔

رپورٹس میں بتایا گیا ہے کہ جاپان میں پالتو جانوروں کی دیکھ بھال کی صنعت (پیٹ کیئر انڈسٹری) کا حجم اب تقریباً 5.5 ارب ڈالر کی ریکارڈ سطح تک پہنچ چکا ہے۔ یہی وجہ ہے کہ بے بی کیئر پروڈکٹس بنانے والی کمپنیاں اب پالتو جانوروں کے لیے خصوصی کیریئر، ڈائپر، فیشن ایبل لباس، خوراک اور دیگر پرتعیش اشیا تیار کرنے پر مجبور ہو گئی ہیں۔

ماہرینِ معاشرت کا کہنا ہے کہ جدید جاپانی معاشرے میں پالتو جانور اب محض جانور نہیں رہے، بلکہ انہیں خاندان کے ایک اہم اور لاڈلے فرد، یہاں تک کہ حقیقی بچوں جیسا مقام دیا جا رہا ہے۔ تنہائی اور گرتے ہوئے خاندانی نظام کے باعث لوگ پالتو جانوروں کی دیکھ بھال، ان کے علاج معالجے اور آسائشوں پر دل کھول کر اخراجات کر رہے ہیں، جس نے اس صنعت کو ملکی معیشت کا ایک بڑا حصہ بنا دیا ہے۔