تیل کی قیمتیں ایک ماہ کی بلند ترین سطح پر پہنچ گئیں

امریکہ اور ایران کے درمیان مسلسل تیسرے روز بھی جاری رہنے والی فوجی کشیدگی کے نتیجے میں عالمی منڈی میں خام تیل کی قیمتیں ایک ماہ کی بلند ترین سطح پر پہنچ گئی ہیں، جبکہ حساس ترین بحری تجارتی گزرگاہ ‘آبنائے ہرمز’ میں بحری جہازوں کی آمدورفت میں 50 فیصد سے زائد کی نمایاں کمی ریکارڈ کی گئی ہے۔ عالمی میڈیا رپورٹس کے مطابق، بین الاقوامی معیار کے حامل برینٹ کروڈ کی قیمت میں منگل کو مزید 2 فیصد اضافہ ہوا، جبکہ اس سے قبل گزشتہ روز اس کی قیمت میں 9.6 فیصد کا بڑا اچھال دیکھا گیا تھا۔ ستمبر کے لیے برینٹ خام تیل کے سودے 84.91 ڈالر فی بیرل تک پہنچ گئے ہیں، جو کہ گزشتہ ماہ امریکہ اور ایران کے درمیان مفاہمتی یادداشت کے بعد ہونے والی کمی کے برعکس، حالیہ تنازع کی وجہ سے اب تک مجموعی طور پر 17 فیصد تک مہنگا ہو چکا ہے۔ مارکیٹ تجزیہ کاروں نے خبردار کیا ہے کہ اگر یہ فوجی کشیدگی برقرار رہی اور تیل کی سپلائی لائن متاثر ہوئی تو قیمتیں 100 ڈالر فی بیرل تک جا سکتی ہیں، جس سے عالمی معیشت اور توانائی کی ترسیل پر انتہائی سنگین اثرات مرتب ہوں گے۔