وفاق اپنے نظام کی خامیوں کا بوجھ عوام پر ڈالنے کے بجائے انہیں دور کرے، سہیل آفریدی

وزیرِ اعلیٰ خیبر پختونخوا محمد سہیل آفریدی نے صوبے میں بجلی کی غیر اعلانیہ لوڈشیڈنگ، کم وولٹیج اور ترقیاتی منصوبوں میں تاخیر پر سخت برہمی کا اظہار کرتے ہوئے وفاق پر زور دیا ہے کہ وہ اپنے نظام کی خامیوں کا بوجھ عوام پر ڈالنے کے بجائے انہیں فوری دور کرے۔ توانائی سے متعلق ایک اہم اجلاس کی صدارت کرتے ہوئے انہوں نے پیسکو، ٹیسکو اور ہیسکو کو بجلی کے 1,638 زیرِ التوا کیسز فوری نمٹانے کی ہدایت کی اور ادائیگیوں کے باوجود کھمبوں و ٹرانسفارمرز کی عدم فراہمی پر شدید تشویش ظاہر کی۔ وزیرِ اعلیٰ نے واضح کیا کہ خیبر پختونخوا اپنی ضرورت سے دو گنا زائد بجلی اور گیس پیدا کرنے کے باوجود بدترین لوڈشیڈنگ اور سی این جی اسٹیشنز کی بندش کا عذاب جھیل رہا ہے، جو کہ صوبے کے ساتھ سراسر ناانصافی اور امتیازی سلوک ہے۔ انہوں نے انکشاف کیا کہ پن بجلی کے خالص منافع (NHP) کی مد میں وفاق پر خیبر پختونخوا کے 2200 ارب روپے سے زائد واجب الادا ہیں۔ مزید برآں، انہوں نے محکموں کو سخت احکامات جاری کیے کہ شدید گرم علاقوں میں ستمبر اور دیگر اضلاع میں دسمبر تک بجلی کی تمام جاری اسکیمیں ہر صورت مکمل کی جائیں۔