قومی ٹیسٹ اسکواڈ دورۂ ویسٹ انڈیز کے لیے روانہ؛

پاکستان کی قومی ٹیسٹ کرکٹ ٹیم ویسٹ انڈیز کے خلاف شیڈول سیریز کے لیے اسلام آباد انٹرنیشنل ایئرپورٹ سے روانہ ہو گئی ہے۔ قومی اسکواڈ اسلام آباد سے براستہ دوحہ اور لندن ہوتا ہوا ویسٹ انڈیز پہنچے گا، جہاں وہ آئی سی سی ورلڈ ٹیسٹ چیمپئن شپ کے تحت دو اہم ٹیسٹ میچز کھیلے گا۔ ویسٹ انڈیز روانگی سے قبل قومی کھلاڑیوں نے راولپنڈی کرکٹ اسٹیڈیم میں تین روزہ بھرپور ٹریننگ سیشن میں حصہ لیا اور اپنی تیاریوں کو حتمی شکل دینے کے لیے دو روزہ سناریو بیسڈ پریکٹس میچ بھی کھیلا۔ شیڈول کے مطابق، پاکستانی ٹیم ویسٹ انڈیز پہنچ کر باقاعدہ سیریز سے قبل 18 سے 21 جولائی تک چار روزہ وارم اپ میچ کھیلے گی، جس کے بعد دونوں ٹیموں کے درمیان دو ٹیسٹ میچز 25 جولائی سے 10 اگست تک برائن لارا کرکٹ اکیڈمی ٹوروبا اور کوئینز پارک اوول پورٹ آف اسپین (ٹرینیڈاڈ اینڈ ٹوباگو) میں کھیلے جائیں گے۔