کراچی: مختلف علاقوں میں مبینہ پولیس مقابلے، ایک ملزم ہلاک ، 11 گرفتار

کراچی کے مختلف علاقوں میں پولیس نے جرائم پیشہ عناصر کے خلاف کارروائیاں کرتے ہوئے مبینہ مقابلوں کے دوران ایک ملزم کو ہلاک جبکہ زخمیوں سمیت 11 ملزمان کو گرفتار کر لیا ہے۔ ڈسٹرکٹ ویسٹ کے علاقے اقبال مارکیٹ (سیکٹر ساڑھے 11) میں پولیس اور ڈکیت گینگ کے درمیان دوطرفہ فائرنگ کے نتیجے میں ایک ملزم محمد عثمان کو زخمی حالت میں، جبکہ اس کے تین ساتھیوں علی رحمت، شعیب اور مبین کو بلاضررب گرفتار کیا گیا۔ ملزمان کے قبضے سے 3 پستول، چھینے گئے موبائل فون اور نقدی برآمد کر لی گئی۔ ادھر لیاقت آباد (سپر مارکیٹ ندی کنارہ) میں پولیس مقابلے کے دوران ایک ملزم نعمان ولد یعقوب ہلاک ہو گیا جبکہ اس کے زخمی ساتھی محمد شہود کو گرفتار کر لیا گیا، تاہم ان کا ایک اور ساتھی فرار ہونے میں کامیاب رہا۔

دوسری جانب، یونیورسٹی روڈ پر وفاقی اردو یونیورسٹی کے قریب عزیز بھٹی پولیس نے فائرنگ کے تبادلے کے بعد دو ڈاکو بھائیوں عبدالکریم اور طارق کو گرفتار کر لیا، جن میں سے ایک زخمی ہے اور انہیں اسپتال منتقل کر دیا گیا ہے۔ اسی طرح جمشید کوارٹرز پولیس نے مبینہ مقابلے کے بعد دو ڈاکوؤں عاصم عرف شیلا اور احسن عرف بھانجا کو اسلحے سمیت دھر لیا۔ الفلاح کے علاقے ملیر جمعہ گوٹھ بن کے قریب بھی پولیس اور اسٹریٹ کرمنلز کے درمیان فائرنگ کا تبادلہ ہوا، جس کے بعد ایس ایچ او الفلاح کی نگرانی میں دو عادی ملزمان مسعود اور عبدالقادر کو زخمی حالت میں گرفتار کر کے جناح اسپتال منتقل کیا گیا۔ پولیس نے تمام ملزمان کے خلاف مقدمات درج کر کے مزید تفتیش کا آغاز کر دیا ہے