برآمدات میں کمی تشویشناک، پاکستان 8 ارب ڈالر کی ممکنہ آمدن سے محروم: گوہر اعجاز

سابق وفاقی وزیرِ تجارت ڈاکٹر گوہر اعجاز نے ملکی معیشت کی موجودہ صورتحال پر گہری تشویش کا اظہار کرتے ہوئے انکشاف کیا ہے کہ گزشتہ دو برسوں میں پاکستان کی برآمدات بڑھنے کے بجائے کم ہو گئی ہیں، جس کے باعث ملک 8 ارب ڈالر کی ممکنہ برآمدی آمدن سے محروم رہا ہے۔ سماجی رابطے کی ویب سائٹ ‘ایکس’ پر جاری اپنے ایک اہم پیغام میں انہوں نے بتایا کہ ملکی برآمدات میں سالانہ 10 فیصد اضافے کا مقررہ ہدف حاصل نہیں کیا جا سکا ہے، جس کا براہِ راست نتیجہ یہ نکلا ہے کہ ملک کا تجارتی خسارہ اس وقت تاریخ کی بلند ترین سطح پر پہنچ چکا ہے۔

ڈاکٹر گوہر اعجاز نے موجودہ برآمدی صورتحال کو معیشت کے لیے انتہائی تشویشناک قرار دیتے ہوئے متعلقہ حکام کو خبردار کیا کہ ملکی معیشت کو مستحکم بنانے کے لیے برآمدات میں اضافہ ناگزیر ہے۔ انہوں نے زور دیا کہ اگر موجودہ صورتحال پر فوری توجہ نہ دی گئی تو آنے والے دنوں میں پاکستان کی معاشی مشکلات میں مزید سنگین اضافہ ہو سکتا ہے۔ انہوں نے اربابِ اختیار کو مشورہ دیا کہ اب بھی وقت ہے کہ ملک کو معاشی بحران سے نکالنے اور برآمدات کو بڑھانے کے لیے ہنگامی بنیادوں پر فوری اور مؤثر اقدامات کیے جائیں۔