ثابت کر چکے اسرائیل یمن سے ایران تک کہیں بھی پہنچ سکتا ہے، اسرائیلی وزیر دفاع

اسرائیلی وزیر دفاع اسرائیل کاٹز نے خطے کی کشیدہ صورتحال کے درمیان ایک بار پھر جارحانہ تیور اپناتے ہوئے دعویٰ کیا ہے کہ اسرائیل عسکری طور پر یہ ثابت کر چکا ہے کہ وہ یمن سے لے کر ایران تک کہیں بھی پہنچنے اور نشانہ بنانے کی مکمل صلاحیت رکھتا ہے۔ اپنے ایک حالیہ تند و تیز بیان میں اسرائیلی وزیر دفاع کا کہنا تھا کہ اسرائیل مہم جوئی سے پیچھے نہیں ہٹے گا اور ضرورت پڑنے پر پہلے سے بھی کہیں زیادہ طاقت اور شدت کے ساتھ ایران پر براہِ راست حملے کرنے کے لیے ہر وقت تیار ہے۔

اسرائیل کاٹز نے اپنی فوج کی جنگی تیاریوں کا حوالہ دیتے ہوئے مزید کہا کہ صیہونی افواج خطے میں دوبارہ لڑائی شروع کرنے کے لیے پوری طرح الرٹ اور ہائی پوزیشن پر ہیں۔ انہوں نے واضح کیا کہ ہماری فوجی و سیکیورٹی مہم ابھی ختم نہیں ہوئی ہے اور اسرائیل اپنے اہداف کے حصول تک کارروائیاں جاری رکھے گا۔ مبصرین کے مطابق اسرائیلی وزیر دفاع کا یہ بیان خطے میں جاری موجودہ تنازع اور ایران امریکہ کشیدگی کے تناظر میں انتہائی اہمیت کا حامل ہے، جس سے مشرقِ وسطیٰ میں جنگ کے بادل مزید گہرے ہونے کا خدشہ ہے۔