شہید ایرانی سپریم لیڈر آیت اللہ علی خامنہ ای کو مشہد میں سپرد خاک کر دیا گیا

ایران کے شہید سپریم لیڈر اور رہبرِ معظم آیت اللہ علی خامنہ ای کو تہران، قم، نجف اور کربلا میں الوداعی تعزیتی جلوسوں کے بعد مقدس شہر مشہد میں حضرت امام علی رضا علیہ السلام کے روضہ مبارک کے احاطے میں انتہائی عقیدت و احترام اور آشکبار آنکھوں کے ساتھ سپردِ خاک کر دیا گیا ہے۔ شہید رہبرِ اعلیٰ کی آخری نمازِ جنازہ مشہد میں ان کے صاحبزادے مصطفیٰ خامنہ ای نے پڑھائی۔ اس تاریخی اور الوداعی موقع پر اپنے محبوب قائد کو آخری بار دیکھنے اور خراجِ عقیدت پیش کرنے کے لیے مشہد کی تمام بڑی شاہراہوں اور سڑکوں پر سوگواروں اور زائرین کا ایک بے کراں سمندر امڈ آیا، جس کی وجہ سے شہر کا پورا نظام نوحہ و بکا کی فضا میں گم رہا۔

مشہد لائے جانے سے قبل آیت اللہ علی خامنہ ای کا جسدِ خاکی عراق منتقل کیا گیا تھا، جہاں انہیں اسلامی تاریخ کے مقدس ترین مقامات کا الوداعی سفر کرایا گیا۔ ان کی میت کو کربلا معلیٰ میں نواسۂ رسول حضرت امام حسین علیہ السلام اور حضرت غازی عباس علمدار علیہ السلام کے روضہ ہائے مبارک پر لے جایا گیا، جہاں الوداعی مراسم اور نمازِ جنازہ ادا کی گئی۔ عراقی حکام کی جانب سے جاری کردہ اعداد و شمار کے مطابق، نجف اور کربلا میں نکالے گئے تعزیتی جلوسوں میں ایک کروڑ سے زائد سوگواروں نے شرکت کی، جو کہ تاریخ کا ایک بڑا اجتماع ہے۔ یاد رہے کہ آیت اللہ علی خامنہ ای 28 فروری کو ایران پر ہونے والے امریکی اور اسرائیلی فضائی حملوں میں شہید ہوئے تھے، جن کی تدفین کے ساتھ ہی ایران کے ایک طویل تاریخی باب کا اختتام ہو گیا ہے۔