ایرانی فوج کا ایک بار پھر علی خامنہ ای کے قتل کا بدلہ لینے کا اعلان

ایران کے طاقتور عسکری و دفاعی ادارے ‘خاتم الانبیاء ہیڈکوارٹرز’ کے کمانڈر جنرل علی عبداللہی نے شدید ردعمل کا اظہار کرتے ہوئے اعلان کیا ہے کہ ایرانی مسلح افواج اپنے شہید رہبرِ معظم اور سپریم لیڈر سید علی خامنہ ای کے قتل کا بدلہ ہر قیمت پر ضرور لیں گی۔ اپنے ایک باضابطہ اور سخت ترین بیان میں کمانڈر جنرل علی عبداللہی کا کہنا تھا کہ ہم رہبرِ اعلیٰ کے قاتلوں سے سخت ترین قصاص لیں گے اور اس بزدلانہ کارروائی میں ملوث تمام عناصر کو ان کے کیفرِ کردار تک پہنچایا جائے گا۔ انہوں نے دشمن کو سخت وارننگ دیتے ہوئے کہا کہ جارح قوتیں اور دشمن عناصر ایرانی قوم کے اس بڑے قومی و مذہبی غم کو ہرگز اس کی کمزوری سمجھنے کی غلطی نہ کریں، بلکہ وہ دن گننا شروع کر دیں کیونکہ انہیں اپنے ان سنگین جرائم کا پورا حساب دینا ہوگا۔

جنرل علی عبداللہی نے ایرانی عسکری قوت اور عزم کا اعادہ کرتے ہوئے مزید کہا کہ ایرانی قوم کے غیور اور بہادر فوجی جوان ہر محاذ پر الرٹ ہیں اور وہ بہت جلد اپنے دفاعی اقدامات سے دشمن کی نیندیں حرام کر دیں گے۔ انہوں نے واضح الفاظ میں کہا کہ عسکری قیادت اور جوان جلد یا بدیر ان تمام دہشت گردانہ جرائم کے ذمہ دار عناصر سے چن چن کر انتقام لے کر رہیں گے اور ایرانی حدود و قائدین پر حملہ کرنے والوں کو اس کی بھاری قیمت چکانی پڑے گی۔ عسکری کمانڈر کے اس جارحانہ بیان کے بعد خطے میں پہلے سے موجود شدید ترین کشیدگی اور جنگی صورتحال میں مزید اضافے کا امکان ظاہر کیا جا رہا ہے