ایرانی فضائی دفاعی نظام نے امریکی ایم کیو نائن ڈرون تباہ کر دیا، پاسداران انقلاب

ایران اور امریکہ کے مابین جاری شدید فوجی کشیدگی کے دوران ایرانی پاسدارانِ انقلاب (IRGC) نے ایک بڑا دعویٰ کرتے ہوئے کہا ہے کہ ایرانی فوج کے جدید فضائی دفاعی نظام (Air Defense System) نے کارروائی کرتے ہوئے فضا میں پیش قدمی کرنے والے ایک امریکی ایم کیو نائن (MQ-9 Reaper) ڈرون طیارے کو کامیابی سے تباہ کر دیا ہے۔ سپاہِ پاسدارانِ انقلاب کی جانب سے جاری کردہ باضابطہ بیان کے مطابق، گزشتہ روز ملک کی فضائی حدود کی نگرانی پر مامور جدید ترین ایئر ڈیفنس سسٹم نے اس امریکی جاسوس و جنگی ڈرون کو ہدف بنایا۔ ایرانی سرکاری میڈیا پر ایک ویڈیو بھی جاری کی گئی ہے جس میں دفاعی نظام کے میزائل کو امریکی ڈرون کو فضا ہی میں  تباہ کرتے ہوئے دیکھا جا سکتا ہے۔

 امریکی فورسز کی جانب سے ایران پر مسلسل تیسرے روز بھی شدید فضائی حملوں کا سلسلہ جاری ہے، جن میں ایران کے مختلف شہروں میں متعدد عسکری و شہری اہداف کو نشانہ بنایا گیا ہے۔ ایرانی خبر رساں ایجنسی کے مطابق، آج بھی امریکی طیاروں کی بمباری کے باعث ایران کے ساحلی شہر کونارک میں 3، جبکہ بوشہر اور چغادک کے علاقوں میں 6 ہولناک دھماکوں کی آوازیں سنی گئیں، اس کے علاوہ بندر عباس میں بھی شدید دھماکے رپورٹ ہوئے ہیں۔ مبصرین کا کہنا ہے کہ ایرانی حدود میں امریکی ڈرون گرائے جانے کے اس واقعے کے بعد دونوں ممالک کے مابین جاری براہِ راست جنگ مزید خطرناک رخ اختیار کر سکتی ہے۔