امریکہ کے ایران پر مسلسل تیسرے روز بھی حملے جاری، مختلف شہروں میں متعدد دھماکوں کی آوازیں سنی گئیں

امریکی فورسز کی جانب سے ایران کی خود مختاری پر مسلسل تیسرے روز بھی جارحانہ فضائی حملوں کا سلسلہ جاری ہے، جن میں ایران کے مختلف شہروں میں متعدد فوجی و شہری اہداف کو نشانہ بنایا گیا ہے۔ ایرانی خبر رساں ایجنسی کے مطابق، تازہ ترین حملوں میں ایران کے ساحلی شہر کونارک میں 3، جبکہ بوشہر اور چغادک میں 6 زوردار دھماکوں کی آوازیں سنی گئیں، اس کے علاوہ بندر عباس میں بھی شدید دھماکے ہوئے ہیں۔ یاد رہے کہ اس سے قبل امریکہ نے ایران کے 5 صوبوں میں شہری تنصیبات پر وحشیانہ بمباری کرتے ہوئے 90 اہداف کو نشانہ بنایا تھا، جن میں بوشہر، چاہ بہار، بندر عباس، سِرک، کونارک، جسک اور ابو موسیٰ کے علاقے شامل تھے۔ ان مسلسل حملوں کے نتیجے میں اب تک مجموعی طور پر 14 ایرانی شہری و اہلکار شہید اور درجنوں شدید زخمی ہو چکے ہیں، جن میں خوزستان میں پاسدارانِ انقلاب کے 3 اہلکار اور ایران شہر ایئر پورٹ پر حملے میں شہید ہونے والے فائر فائٹرز بھی شامل ہیں۔

ایرانی حکام کے مطابق، امریکی طیاروں نے بوشہر میں قائم حساس جوہری بجلی گھر (نیوکلیئر پاور پلانٹ) کے قریبی علاقے کو بھی فضائی حملے کا نشانہ بنایا، جبکہ چاہ بہار میں بمباری کے باعث بجلی کا پورا نظام شدید متاثر ہوا ہے۔ ایک اور واقعے میں امریکی میزائل کا ملبہ گرنے سے امام علی ہسپتال کی عمارت کو شدید نقصان پہنچا۔ بنیادی ڈھانچے کو نشانہ بنانے کی اس امریکی مہم کے دوران صوبہ گلستان کے شہر عقلہ میں ایک اہم ریلوے پل کو میزائل سے اڑا دیا گیا، جس کے باعث ملک میں ٹرینوں کی آمدورفت اور لاجسٹک سپلائی معطل ہو کر رہ گئی ہے۔ ایرانی دفاعی حکام صورتحال کا جائزہ لے رہے ہیں اور ان حملوں کے بعد ملک بھر میں سیکیورٹی ہائی الرٹ ہے۔