پاک بحریہ اور پی ایم ایس اے کا مشترکہ ریسکیو آپریشن، 20 افراد کو ڈوبنے سے بچالیا

پاک بحریہ اور پاکستان میری ٹائم سیکیورٹی ایجنسی (PMSA) نے سمندر میں انسانی جانوں کے تحفظ کی اعلیٰ مثال قائم کرتے ہوئے 24 گھنٹوں کے دوران دوسرا کامیاب مشترکہ ریسکیو آپریشن کیا ہے، جس میں اورماڑہ کے قریب سمندر میں ڈوبنے والی ایک مال بردار کشتی کے تمام 20 پاکستانی عملے کے ارکان کو بحفاظت بچا لیا گیا ہے۔ پاک فوج کے شعبہ تعلقات عامہ (ISPR) کے مطابق، مال بردار کشتی میں اچانک پانی بھر جانے کے باعث وہ سمندر میں غرقاب ہونے لگی تھی، جس پر کشتی کے عملے کی جانب سے جوائنٹ میری ٹائم انفارمیشن کوآرڈی نیشن سینٹر کو ہنگامی امدادی کال موصول ہوئی۔

آئی ایس پی آر کے مطابق، امدادی کال ملتے ہی پاک بحریہ نے فوری ایکشن لیا اور اپنے جدید جنگی جہاز “پی این ایس حنین” سمیت ضروری فضائی وسائل کو فوراً جائے وقوعہ کی طرف روانہ کیا۔ بحری اور فضائی ٹیموں نے مشترکہ طور پر بروقت اور انتہائی مہارت سے کارروائی کرتے ہوئے طوفانی لہروں میں گھری کشتی میں سوار تمام 20 افراد کو نکال کر محفوظ مقام پر منتقل کر دیا۔ آئی ایس پی آر نے اپنے بیان میں مزید واضح کیا کہ پاک بحریہ اور پاکستان میری ٹائم سیکیورٹی ایجنسی سمندری حدود میں کسی بھی ہنگامی صورتحال سے نمٹنے اور قیمتی انسانی جانوں کے دفاع کے لیے چوبیس گھنٹے مکمل طور پر ہائی الرٹ اور تیار ہیں۔