تیل فروخت کا ایرانی لائسنس منسوخ، عالمی منڈی میں خام تیل کی قیمتوں میں اضافہ

امریکی محکمہ خزانہ کی جانب سے ایرانی تیل کی محدود فروخت کی اجازت دینے والا 21 جون کا جنرل لائسنس منسوخ کیے جانے اور ایران پر حالیہ امریکی حملوں کے بعد عالمی منڈی میں خام تیل کی قیمتوں میں نمایاں اضافہ ریکارڈ کیا گیا ہے۔ غیر ملکی خبر رساں ادارے کے مطابق، ان جغرافیائی و سیاسی کشیدگیوں کے باعث عالمی منڈی میں برینٹ خام تیل کی قیمت میں 1.87 ڈالر فی بیرل کا اضافہ ہوا، جس سے اس کی نئی قیمت 76.03 ڈالر فی بیرل تک پہنچ گئی۔ دوسری جانب، امریکی خام تیل (WTI) کی قیمت میں بھی 3 فیصد سے زائد کا بڑا اضافہ دیکھا گیا ہے، جس کے بعد وہ 72.65 ڈالر فی بیرل کی سطح پر بند ہوا ہے۔ ماہرین کے مطابق، ایران اور امریکہ کے درمیان بڑھتی ہوئی کشیدگی اور سخت پابندیوں کے باعث عالمی سپلائی متاثر ہونے کے خدشات نے مارکیٹ کو تیزی کی جانب دھکیلا ہے۔