وفاقی وزیرِ خزانہ کا بڑا اقدام؛ اسٹیٹ بینک کی سربراہی میں ‘ایس ایم ای فنانس ٹاسک فورس’ قائم

وفاقی وزیرِ خزانہ محمد اورنگزیب نے اسٹیٹ بینک کی سربراہی میں ‘ایس ایم ای فنانس ٹاسک فورس’ کے قیام کا باقاعدہ اعلان کیا ہے، جس میں بینکنگ شعبے کے نمائندے بھی شامل ہوں گے۔ جاری کردہ اعلامیے کے مطابق، یہ ٹاسک فورس چھوٹے اور درمیانے درجے کے کاروباروں (SMEs) کے لیے قرضوں تک رسائی بڑھانے اور اس ضمن میں عملی تجاویز پیش کرے گی۔ وزیرِ خزانہ نے کہا کہ ایس ایم ایز، برآمدات، زراعت، صنعت، تعمیرات، ہاؤسنگ اور آئی ٹی کو قرضوں کی فراہمی ہماری قومی ترجیح ہے اور چھوٹے کاروباروں کو مالی سہولتیں دینا پورے بینکنگ شعبے کی مشترکہ ذمہ داری ہے۔ انہوں نے بتایا کہ پاکستان نے گزشتہ مالی سال ریکارڈ ترسیلاتِ زر، بہتر زرمبادلہ ذخائر اور کم مالی خسارے جیسے مضبوط معاشی اشاریوں کے ساتھ مکمل کیا ہے۔

محمد اورنگزیب کے مطابق، بجٹ 27-2026 میں سرمایہ کاری، برآمدات اور تنخواہ دار طبقے کے لیے اہم اقدامات کیے گئے ہیں، جبکہ حکومت درمیانی مدت کی ٹیکس حکمت عملی متعارف کرائے گی تاکہ کاروباری برادری کو مستحکم ماحول مل سکے۔ انہوں نے مزید کہا کہ ٹیکس نظام کو خودکار بنایا جا رہا ہے، جبکہ نجی شعبے کے لیے قرضوں کی گنجائش بڑھانے اور ‘ورچوئل اثاثہ ایکٹ 2026’ کے تحت ڈیجیٹل اثاثوں کے ریگولیٹری فریم ورک سمیت سائبر سیکیورٹی کو مزید مضبوط کیا جا رہا ہے۔