معیشت مضبوط استحکام کے ساتھ آگے بڑھ رہی ہے، جی ڈی پی 3.7 فیصد ریکارڈ؛ وزیرِ خزانہ

وفاقی وزیرِ خزانہ محمد اورنگزیب نے معاشی صورتحال پر گفتگو کرتے ہوئے کہا ہے کہ گزشتہ مالی سال کا اختتام مجموعی طور پر مضبوط معاشی استحکام پر ہوا ہے، جہاں بڑی صنعتوں کی نمو کے باعث جی ڈی پی (GDP) شرح 3.7 فیصد ریکارڈ کی گئی اور ملکی زرمبادلہ ذخائر بڑھ کر 18.4 ارب ڈالر تک پہنچ گئے۔ انہوں نے بتایا کہ مالی سال 2026ء میں ترسیلاتِ زر 41 سے 42 ارب ڈالر رہنے کا تخمینہ ہے، جبکہ روشن ڈیجیٹل اکاؤنٹس کے انفلوز بھی ماہانہ 18 کروڑ سے بڑھ کر 30 کروڑ ڈالر ہو چکے ہیں۔ وزیرِ خزانہ کے مطابق، یورو بانڈز اور پانڈا بانڈز کے ذریعے عالمی کیپیٹل مارکیٹس تک پاکستان کی رسائی ہوئی ہے، جبکہ اسٹاک ایکسچینج میں 11 نئے آئی پی اوز (IPOs) آئے ہیں جن میں ‘جین زی’ (Gen Z) کے نئے سرمایہ کار گہری دلچسپی لے رہے ہیں۔ انہوں نے بجٹ اقدامات کا ذکر کرتے ہوئے کہا کہ چھوٹے کاروباروں اور تعمیراتی شعبے کے فروغ کے لیے سپر ٹیکس کا خاتمہ اور ریلیف دیا گیا ہے، جبکہ زرعی مشینری پر ڈیوٹیز صفر کر دی گئی ہیں۔ وزیرِ خزانہ نے ریٹیل سیکٹر کو ٹیکس نیٹ میں لانے، ٹیکس نظام کو تکنیکی بنیادوں پر استوار کرنے اور نجکاری کمیشن کو 28 ریاستی ادارے منتقل کرنے کا اعلان بھی کیا۔ اس کے ساتھ ہی انہوں نے کمرشل بینکوں اور گورنر اسٹیٹ بینک کو سائبر سیکیورٹی مزید پختہ کرنے کی ہدایت بھی جاری کی ہے۔