اغوا اور زیادتی کیس، رضا ڈار کی گاڑی میں غیر ملکی خواتین کو ایئرپورٹ لے جانے کے شواہد سامنے آگئے

لاہور کے علاقے ڈیفنس میں غیر ملکی خواتین سے مبینہ جنسی زیادتی اور اغوا کے ہائی پروفائل کیس میں ایک اور بڑی پیش رفت سامنے آئی ہے، جہاں مرکزی ملزم رضا ڈار کی گاڑی میں خواتین کو ایئرپورٹ لے جانے کے ٹھوس شواہد اور سی سی ٹی وی (CCTV) فوٹیج منظرِ عام پر آگئی ہے۔

 سی سی ٹی وی فوٹیج میں دیکھا جا سکتا ہے کہ مغوی غیر ملکی خواتین کو ملزم رضا ڈار کی گاڑی میں ایئرپورٹ لے جایا جا رہا تھا کہ غازی روڈ پر تیز رفتاری کے باعث سامنے سے آنے والی ایک دوسری گاڑی سے اس کا شدید ٹکراؤ ہو گیا۔

مقدمے کی مدعی اور غیر ملکی لڑکی اسٹیفنی نے پولیس کو دیے گئے اپنے بیان میں اس رات کا احوال بتاتے ہوئے کہا کہ جب گاڑی کا ایکسیڈنٹ ہوا تو وہ اور ان کی ساتھی گاڑی سے باہر نکل آئیں۔ اس دوران دوسری گاڑی میں سوار فیملی نے صورتحال کو مشکوک بھانپتے ہوئے فوری طور پر ‘ون فائیو’ (15) پر کال کر کے پولیس کو بلا لیا۔ غیر ملکی خاتون کے مطابق، جب پولیس موقع پر پہنچی تو انہوں نے خود کو محفوظ سمجھا اور پولیس کو اپنی آپ بیتی سنائی۔

دوسری جانب، پولیس پہلے ہی ملزمان کے ڈی این اے (DNA) سیمپلز حاصل کر کے نمونے فرانزک لیبارٹری بھجوا چکی ہے۔ اس افسوسناک واقعے کا شکار ہونے والی غیر ملکی خواتین نے پولیس افسران کو یقین دہانی کرائی ہے کہ وہ کیس کی مکمل پیروی کریں گی۔ ذرائع کا کہنا ہے کہ دونوں خواتین اپنے وطن واپسی کے بعد بھی متعلقہ ایمبیسی اور آن لائن زوم (Zoom) میٹنگز کے ذریعے عدالتی کارروائی کا باقاعدہ حصہ بنیں گی تاکہ ملزمان کو کیفرِ کردار تک پہنچایا جا سکے