گوادر کے علاقے پانوان کے قریب سے 5 افراد کی لاشیں برآمد،پولیس ذرائع

بلوچستان کے ساحلی شہر گوادر کے علاقوں پانوان اور گنز کے درمیانی علاقے سے پانچ افراد کی لاشیں برآمد ہوئی ہیں، جس کے بعد علاقے میں سنسنی پھیل گئی ہے۔ لاشوں کو فوری طور پر ضروری قانونی کارروائی کے لیے سول اسپتال جیونی منتقل کر دیا گیا ہے۔

پولیس ذرائع کے مطابق، برآمد ہونے والی پانچ لاشوں میں سے دو افراد کی شناخت کر لی گئی ہے جن کے نام شاہ بخش اور پیری عیسیٰ بتائے گئے ہیں۔ تفتیش کے دوران معلوم ہوا ہے کہ ان دونوں مقتولین کا تعلق تحصیل جیونی کے علاقے روبار سے تھا۔

ذرائع کا مزید کہنا ہے کہ باقی تین افراد کی شناخت تاحال ممکن نہیں ہو سکی ہے اور ان نامعلوم افراد کی لاشیں شناخت کے عمل کے لیے سول اسپتال جیونی کے سرد خانے میں رکھی گئی ہیں۔ پولیس حکام نے واقعے کا نوٹس لیتے ہوئے ہلاکتوں کی وجوہات جاننے کے لیے باقاعدہ تحقیقات کا آغاز کر دیا ہے جبکہ دیگر مقتولین کی شناخت کے لیے بھی کارروائی کی جا رہی ہے۔