کراچی میں گھریلو جھگڑے پر فائرنگ سے خاتون جاں بحق، ملزم گرفتار

شہر قائد کے پوش علاقے ڈیفنس میں گھریلو جھگڑے کے دوران فائرنگ کا افسوسناک واقعہ پیش آیا ہے، جس کے نتیجے میں بیچ بچاؤ کرانے والی ایک خاتون گولی لگنے سے جاں بحق ہو گئی ہیں، جبکہ فائرنگ کرنے والے ملزم کو پولیس نے زخمی حالت میں گرفتار کر لیا ہے۔

پولیس حکام کے مطابق، یہ واقعہ ڈیفنس فیز 5 میں پیش آیا جہاں میاں بیوی کے درمیان شدید جھگڑا چل رہا تھا۔ تفتیشی حکام کا کہنا ہے کہ میاں بیوی کے اس جھگڑے کے دوران گھر میں موجود ایک خاتون بیچ بچاؤ کرانے کی کوشش کر رہی تھیں کہ اچانک گولی لگنے سے وہ موقع پر ہی دم توڑ گئیں۔ پولیس کی ابتدائی تفتیش کے مطابق جاں بحق ہونے والی خاتون، ملزم کی بیوی کی خالہ تھیں۔

پولیس نے فائرنگ کرنے والے شخص کی شناخت عمران کے نام سے کی ہے۔ واقعے کے دوران ملزم عمران خود بھی گولی لگنے سے زخمی ہو گیا۔ پولیس نے کارروائی کرتے ہوئے زخمی ملزم کو حراست میں لے کر علاج کے لیے نجی ہسپتال منتقل کر دیا ہے جہاں وہ پولیس کی نگرانی میں زیر علاج ہے۔

تفتیشی ٹیم نے مقتولہ کی لاش کو ضابطے کی کارروائی اور پوسٹ مارٹم کے لیے ہسپتال منتقل کر دیا ہے، جبکہ واقعے کے اصل محرکات کا پتا لگانے کے لیے مزید قانونی تفتیش شروع کر دی گئی ہے۔