یونین کونسل کے صدر کا قتل اور دو افراد زخمی، قاتل کو لانے والا بائیک رائیڈر گرفتار

مومن آباد پولیس نے انٹیلی جنس معلومات اور سی سی ٹی وی فوٹیج کی مدد سے کارروائی کرتے ہوئے یونین کونسل (UC-05) کے صدر کے قتل اور دو افراد کو زخمی کرنے کی واردات میں ملوث اہم ملزم کو گرفتار کر لیا ہے۔

ایس ایس پی ویسٹ طارق الہیٰ مستوئی کے مطابق، یکم جولائی کی رات اورنگی ٹاؤن سیکٹر 10 غوثیہ چوک پر واقع یو سی کے دفتر پر فائرنگ کا افسوسناک واقعہ پیش آیا تھا۔ اس حملے کے نتیجے میں یو سی 5 کے صدر فیصل عباسی موقع پر ہی جاں بحق ہو گئے تھے، جبکہ فہد عباسی اور فہد جمال عرف شانی شدید زخمی ہوئے تھے۔ پولیس نے واقعے کا مقدمہ درج کر کے مختلف زاویوں سے تحقیقات کا آغاز کیا تھا۔

پولیس حکام کا کہنا ہے کہ تفتیش کے دوران جائے وقوعہ سے حاصل کردہ سی سی ٹی وی فوٹیج اور خفیہ اطلاعات کی مدد سے ایک اہم کامیابی حاصل ہوئی، جس کے بعد پولیس نے کارروائی کرتے ہوئے موٹر سائیکل رائیڈر ملزم عبدالحمید عرف کاکا ولد اسلام کو دھر لیا۔ سی سی ٹی وی فوٹیج میں گرفتار ملزم کو مرکزی شوٹر کو مسلح حالت میں موٹر سائیکل پر جائے وقوعہ تک لاتے اور واردات کے بعد فرار کراتے ہوئے واضح طور پر دیکھا جا سکتا ہے۔

گرفتار ملزم کے قبضے سے غیر قانونی اسلحہ اور گولیاں بھی برآمد ہوئی ہیں۔ پولیس نے ملزم کے خلاف ایک اور مقدمہ درج کر کے اسے مزید قانونی کارروائی کے لیے تفتیشی حکام کے حوالے کر دیا ہے، جبکہ قتل کی اس واردات میں ملوث مرکزی شوٹر اور دیگر مفرور ملزمان کی گرفتاری کے لیے چھاپے مارے جا رہے ہیں۔