ایف آئی اے کی کارروائی؛ بیرون ملک بھیجے جانے والے پلیسینٹا کی بڑی کھیپ برآمد

وفاقی تحقیقاتی ادارہ (ایف آئی اے) نے نیو اسلام آباد انٹرنیشنل ایئرپورٹ کے کارگو سیکشن میں ایک بڑی اور کامیاب کارروائی کرتے ہوئے ویتنام اسمگل کرنے کے لیے تیار ‘ہومین پلیسنٹا’ (انسانی نال) کی بھاری کھیپ برآمد کر لی ہے۔

حکام کے مطابق ہومین پلیسنٹا اسمگلنگ کیس میں یہ ایک انتہائی اہم پیش رفت ہے۔ ایف آئی اے کی ٹیم نے کارگو سیکشن پر چھاپہ مار کر 30 کارٹنز پر مشتمل 580 کلو گرام خشک پلیسینٹا قبضے میں لے لیا، جسے سفری دستاویزات کے ساتھ ویتنام روانہ کیا جانا تھا۔

تحقیقاتی ادارے نے بتایا کہ یہ کھیپ پہلے سے گرفتار چینی باشندوں اور ان کے پاکستانی ہمدردوں کے گروہ نے ہی تیار کر کے بک کرائی تھی۔ اس تازہ کارروائی کے بعد اب تک برآمد ہونے والے مجموعی پلیسینٹا کی مقدار 1000 کلو گرام (ایک ٹن) سے بھی تجاوز کر گئی ہے۔ ایف آئی اے کے مطابق اس غیر قانونی کھیپ کو بک کرانے والے ایجنٹ کا سراغ لگا لیا گیا ہے اور اس کی گرفتاری کے لیے چھاپے مارے جا رہے ہیں۔