چارسدہ میں غیرت کے نام پر تین افراد قتل، ملزم فرار

خیبر پختونخوا کے ضلع چارسدہ کے علاقے شبقدر میں مبینہ طور پر غیرت کے نام پر فائرنگ کر کے دو خواتین اور ایک مرد کو بیدردی سے قتل کر دیا گیا ہے۔ پولیس کے مطابق یہ افسوسناک واقعہ یونین کونسل مٹہ مغل خیل میں مبینہ ناجائز تعلقات کے شبے پر پیش آیا۔

پولیس ذرائع کا کہنا ہے کہ واقعے کی اطلاع ملتے ہی پولیس کی بھاری نفری فوری طور پر جائے وقوعہ پر پہنچ گئی، تاہم فائرنگ کرنے والا مبینہ ملزم واردات کے بعد موقع سے فرار ہونے میں کامیاب ہو گیا۔ پولیس نے فوری کارروائی کرتے ہوئے تینوں لاشوں کو اپنی تحویل میں لیا اور ضروری قانونی کارروائی اور پوسٹ مارٹم کے لیے انہیں ٹی ایچ کیو (THQ) ہسپتال شبقدر منتقل کر دیا ہے۔ دوسری جانب پولیس نے واقعے کے محرکات جاننے کے لیے مختلف پہلوؤں سے باقاعدہ تحقیقات کا آغاز کر دیا ہے۔

پولیس حکام کے مطابق فرار ملزم کی گرفتاری کے لیے مختلف ممکنہ ٹھکانوں اور مقامات پر چھاپے مارے جا رہے ہیں اور دعویٰ کیا گیا ہے کہ ملزم کو جلد از جلد گرفتار کر کے قانون کے کٹہرے میں لایا جائے گا۔