ای پیڈ 2.0 کی لانچنگ کی تیاریاں مکمل، سرکاری خریداری میں شفافیت بڑھے گی

حکومت کے “ایک قوم، ایک نظام” وژن کے تحت ڈیجیٹل گورننس کی جانب ایک اور بڑا قدم اٹھاتے ہوئے ای پیڈ 2.0 (e-PAD 2.0) کی لانچنگ کی تیاریاں مکمل کر لی گئی ہیں۔

مینجنگ ڈائریکٹر (ایم ڈی) پیپرا (PPRA) کے مطابق، اس نئے اور جدید ترین نظام کے نفاذ سے سرکاری خریداری (Procurement) کے عمل میں شفافیت اور احتساب کو پہلے سے کہیں زیادہ مؤثر اور فول پروف بنانے میں مدد ملے گی۔

ایم ڈی پیپرا نے گزشتہ کامیابیوں پر روشنی ڈالتے ہوئے بتایا کہ ای پیڈز کے پہلے نظام کے ذریعے مالی سال 25-2024 کے دوران 14 کھرب روپے سے زائد مالیت کے سرکاری لین دین کو کامیابی سے مکمل کیا گیا تھا۔ اس جدید ڈیجیٹل نظام کی بدولت قومی خزانے کو 20 ارب روپے سے زائد کی خطیر رقم کی بچت ممکن ہوئی۔

نظام کی مقبولیت اور افادیت کا تذکرہ کرتے ہوئے انہوں نے مزید بتایا کہ ای پروکیورمنٹ سسٹم میں اب تک 10 ہزار سے زائد سرکاری ادارے اور 51 ہزار سے زائد سپلائرز رجسٹرڈ ہو چکے ہیں، جو اس سسٹم پر عوام اور اداروں کے بھرپور اعتماد کا مظہر ہے۔

ایم ڈی پیپرا کا کہنا تھا کہ ای پیڈ 2.0 کے باقاعدہ نفاذ سے سرکاری خریداری کا پورا ڈھانچہ مزید جدید، تیز رفتار اور شفاف ہو جائے گا۔ اس اقدام سے نہ صرف حکومتی وسائل کا بہتر اور درست استعمال یقینی بنایا جا سکے گا بلکہ ملک میں احتساب کے عمل کو بھی مزید فروغ ملے گا۔