کراچی سونے اور چاندی کی قیمتوں میں بڑی کمی، فی تولہ سونا 5200 روپے سستا ہو گیا

مقامی اور عالمی صرافہ مارکیٹ میں سونے اور چاندی کی قیمتوں میں نمایاں کمی ریکارڈ کی گئی ہے، جس کے بعد سونے کی قیمتیں ایک بار پھر نیچے آ گئی ہیں۔

ملک کے سب سے بڑے کاروباری شہر کراچی کی صرافہ مارکیٹ کے مطابق، فی تولہ سونے کی قیمت میں 5 ہزار 200 روپے کی بڑی کمی دیکھی گئی ہے، جس کے بعد اب فی تولہ سونا 4 لاکھ 19 ہزار 636 روپے کا ہو گیا ہے۔

اسی طرح 10 گرام سونے کی قیمت میں بھی 4 ہزار 458 روپے کی کمی واقع ہوئی ہے اور بازار میں 10 گرام سونا 3 لاکھ 59 ہزار 770 روپے کی سطح پر بند ہوا ہے۔ مقامی مارکیٹ میں قیمتوں میں اس گراوٹ کی بڑی وجہ بین الاقوامی مارکیٹ میں ہونے والی کمی ہے۔ عالمی منڈی میں فی اونس سونا 52 ڈالر سستا ہو گیا ہے، جس کے بعد عالمی سطح پر سونے کی نئی قیمت 3 ہزار 972 ڈالر فی اونس مقرر ہوئی ہے۔ سونے کے ساتھ ساتھ چاندی کے خریداروں کے لیے بھی ریلیف سامنے آیا ہے۔ کراچی میں چاندی کی فی تولہ قیمت 107 روپے گھٹ گئی ہے، جس کے بعد اب چاندی کی نئی قیمت 6 ہزار 242 روپے فی تولہ ہو گئی ہے۔