آسٹریلیا نے ویسٹ انڈیز کو ہراکر ویمنز ٹی 20 ورلڈ کپ کے فائنل میں جگہ بنالی

آئی سی سی ویمنز ٹی20 ورلڈ کپ کے پہلے سیمی فائنل میں آسٹریلیا نے ویسٹ انڈیز کو یکطرفہ مقابلے کے بعد 8 وکٹوں سے شکست دے کر فائنل کے لیے کوالیفائی کرلیا ہے۔

لندن کے تاریخی اوول گراؤنڈ میں کھیلے گئے اس اہم میچ میں ویسٹ انڈیز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 7 وکٹوں کے نقصان پر 125 رنز بنائے۔ ویسٹ انڈیز کی جانب سے کپتان ہیلی میتھیوز 30، ڈیانڈرا ڈوٹن 26 ناٹ آؤٹ، شی مین کیمبل 22 اور کیانا جوزف 16 رنز کے ساتھ نمایاں رہیں۔ آسٹریلیا کی طرف سے عمدہ باؤلنگ کا مظاہرہ کرتے ہوئے ایشلے گارڈنر، سوفی مولینوکس اور جارجیا ویئرہم نے 2، 2 وکٹیں حاصل کیں۔

126 رنز کا ہدف آسٹریلوی ویمن ٹیم نے جارحانہ بیٹنگ کی بدولت محض 13 اوورز میں صرف 2 وکٹوں کے نقصان پر باآسانی حاصل کرلیا۔ اوپنر بیتھ مونی نے شاندار بیٹنگ کرتے ہوئے 61 رنز کی ناقابلِ شکست اننگز کھیلی، جبکہ ایشلے گارڈنر نے 35 رنز بنا کر ان کا بھرپور ساتھ دیا اور ٹیم کو فتح سے ہمکنار کیا۔ جارجیا وول 16 رنز بنا کر آؤٹ ہوئیں، جبکہ اسٹار آل راؤنڈر ایلیس پیری اننگز کے دوران انجری کے باعث ریٹائرڈ ہرٹ ہوکر گراؤنڈ سے باہر چلی گئیں۔