سٹاک مارکیٹ میں تیزی، کاروبار کا مثبت رجحان رہا

پاکستان سٹاک ایکسچینج (PSX) میں زبردست مثبت رجحان اور تیزی کے باعث ہنڈرڈ انڈیکس ایک بار پھر ایک لاکھ 80 ہزار پوائنٹس کی نفسیاتی حد پر بحال ہو گیا ہے۔

کاروباری ہفتے کے دوسرے روز (منگل) مارکیٹ کے آغاز سے ہی سرمایہ کاروں کی جانب سے جارحانہ خریداری دیکھنے میں آئی، جس کے نتیجے میں ہنڈرڈ انڈیکس میں 1886 پوائنٹس کا بڑا اضافہ ریکارڈ کیا گیا۔ اس شاندار تیزی کی بدولت پاکستان سٹاک مارکیٹ کا ہنڈرڈ انڈیکس ایک لاکھ 78 ہزار کی سطح سے چھلانگ لگا کر ایک لاکھ 80 ہزار 301 پوائنٹس کی سطح پر پہنچ گیا۔

مارکیٹ ذرائع کے مطابق، آج دن بھر کاروبار میں بہترین سرگرمی رہی اور مجموعی طور پر 29 ارب 23 کروڑ 3 لاکھ 16 ہزار 321 روپے مالیت کے 29 کروڑ 60 لاکھ 15 ہزار 980 شیئرز کا لین دین ہوا۔

واضح رہے کہ گزشتہ کاروباری دن (پیر) کے اختتام پر سٹاک ایکسچینج میں شدید اتار چڑھاؤ کے بعد ہنڈرڈ انڈیکس ایک لاکھ 78 ہزار 414 پوائنٹس کی سطح پر بند ہوا تھا، تاہم آج مارکیٹ نے اپنی گزشتہ مندی کا ازالہ کرتے ہوئے ایک لاکھ 80 ہزار کی حد دوبارہ حاصل کر لی ہے۔