امریکہ بیٹی کے نام پر حکومت سے فراڈ کرنے والی ماں گرفتار

امریکی ریاست ٹینیسی میں ایک سنسنی خیز اور دل دہلا دینے والا معاملہ سامنے آیا ہے جہاں نو سال سے لاپتا لڑکی کے نام پر سرکاری فوڈ اسٹامپ فوائد حاصل کرنے کے الزام میں پولیس نے اس کی حقیقی ماں کو دھر لیا۔

نیشوِل پولیس کے مطابق 51 سالہ خاتون شینن اینڈرسن پر الزام ہے کہ وہ اپنی لاپتا بیٹی جوڈی “بروک” اینڈرسن کے نام پر حکومت سے امداد وصول کرتی رہی۔ پولیس نے کارروائی کرتے ہوئے خاتون کو گرفتار کر کے ان پر فوڈ اسٹامپ فراڈ کے متعدد سنگین الزامات عائد کر دیے ہیں۔

واضح رہے کہ بروک اینڈرسن کی عمر 18 برس تھی جب 9 اگست 2017 کو اس کے لاپتا ہونے کی رپورٹ درج کرائی گئی۔ تحقیقات کے مطابق بروک کو آخری بار اپنی والدہ کے ساتھ ہی ایک فاسٹ فوڈ ریسٹورنٹ کے باہر دیکھا گیا تھا۔ اس وقت شینن اینڈرسن نے مؤقف اختیار کیا تھا کہ وہ چند لمحوں کے لیے واش روم گئیں اور جب واپس آئیں تو بیٹی غائب تھی۔ تاہم بروک کی خالہ ڈی اینا اینڈرسن نے اس بیان کو مشکوک قرار دیتے ہوئے کہا کہ گمشدگی کی اطلاع فوری دینے کے بجائے کئی ہفتوں بعد دی گئی، جس سے تفتیش کا قیمتی وقت ضائع ہوا۔

ڈی اینا کا مزید کہنا تھا کہ گمشدگی کے وقت بروک اور اس کی والدہ دونوں بے گھر تھیں اور منشیات کی لت کا شکار تھیں، جس کے باعث نوجوان لڑکی پہلے ہی خطرناک حالات میں زندگی گزار رہی تھی۔ برسوں گزرنے کے بعد اب خاندان کی امیدیں ٹوٹ چکی ہیں اور انہیں خدشہ ہے کہ شاید بروک اب زندہ نہیں ہے۔ خالہ نے شدید ردعمل دیتے ہوئے کہا کہ بیٹی کے غائب ہونے کے بعد اس کے نام پر حکومتی امداد بٹورنا ایک ناقابلِ قبول اور شرمناک عمل ہے۔پولیس حکام کے مطابق ملزمہ شینن اینڈرسن اس وقت 22 ہزار ڈالر کے مچلکوں کے تحت جیل میں قید ہیں۔ ان پر فوڈ اسٹامپ فراڈ کے علاوہ جنسی مجرموں کی رجسٹریشن سے متعلق قوانین کی خلاف ورزی کے الزامات بھی عائد کیے گئے ہیں۔ بروک اینڈرسن کی گمشدگی لگ بھگ ایک دہائی گزرنے کے بعد بھی  آج ایک گہرا معمہ بنی ہوئی ہے۔