پرو ہاکی لیگ، پاکستان ہاکی ٹیم کو مسلسل 12ویں شکست

ایف آئی ایچ ہاکی پرو لیگ میں پاکستان کی ناکامیوں کا سلسلہ رک نہ سکا، جہاں قومی ٹیم کو اسپین کے ہاتھوں بھی 4-2 سے شکست کا سامنا کرنا پڑا، جو اس ایونٹ میں پاکستان ہاکی ٹیم کی مسلسل 12ویں ناکامی ہے۔

بیلجیم میں کھیلے گئے اس میچ میں اسپین نے اپنے سینئرز اور اہم کھلاڑیوں کو آرام دے کر نوجوان کھلاڑیوں کو موقع دیا تھا، لیکن اس کے باوجود پاکستانی ٹیم اس سنہری موقع سے کوئی فائدہ نہ اٹھا سکی۔ میچ کے ابتدائی کوارٹر میں دونوں ٹیموں کے درمیان سخت مقابلہ دیکھنے کو ملا اور یہ بغیر کسی گول کے برابر رہا؛ اس دوران اسپین کو برتری حاصل کرنے کا بہترین موقع ملا مگر پاکستانی گول کیپر علی رضا نے شاندار پنالٹی اسٹروک روک کر حریف ٹیم کو پہلے برتری حاصل کرنے سے روک دیا۔

میچ کے 28ویں منٹ میں پاکستان کے ابوبکر محمود نے فیلڈ گول کر کے ٹیم کو 1-0 کی برتری دلائی، لیکن یہ خوشی زیادہ دیر قائم نہ رہ سکی اور اگلے ہی منٹ میں اسپین کے پیپ کینیل نے گول داغ کر مقابلہ 1-1 سے برابر کر دیا، جس کے بعد ہاف ٹائم تک یہی اسکور برقرار رہا۔ تیسرے کوارٹر میں اسپین نے جارحانہ کھیل پیش کرتے ہوئے مسلسل 2 گول کر کے اسکور 3-1 کر دیا، تاہم کوارٹر ختم ہونے سے کچھ دیر قبل ابوبکر محمود نے پاکستان کی جانب سے اپنا دوسرا گول کر کے خسارہ کم کیا۔ چوتھے اور آخری کوارٹر میں اسپینش ٹیم نے ایک اور گول کر کے برتری کو 4-2 کر دیا اور میچ کا اختتام اسی اسکور پر ہوا ڈیزائن۔ ایف آئی ایچ ہاکی پرو لیگ کے آخری مرحلے میں شرکت کے لیے اب پاکستان ہاکی ٹیم انگلینڈ کا رخ کرے گی، جہاں 23 جون کو اس کا روایتی حریف بھارت (انڈیا) کے خلاف اہم میچ شیڈولڈ ہے۔