نوح دستگیر بٹ نے ازبکستان میں جلال الدین سورڈ مقابلہ جیت لیا

پاکستان کے مایہ ناز ویٹ لفٹر اور کامن ویلتھ گیمز کے چیمپئن نوح دستگیر بٹ نے ازبکستان میں منعقدہ عالمی مقابلوں میں شاندار کارکردگی کا مظاہرہ کرتے ہوئے گولڈ میڈل اپنے نام کر لیا ہے۔ گوجرانوالہ سے تعلق رکھنے والے قومی ہیرو نے ورلڈ اسٹرانگ مین مقابلوں میں حریفوں کو چیت کرتے ہوئے معتبر ’جلال الدین سورڈ‘ (تلوار) کا تاریخی ٹائٹل بھی جیت کر دنیا بھر میں ملک کا نام روشن کر دیا ہے۔

ان منفرد اور کٹھن طرز کے مقابلوں میں دنیا بھر کے 20 سے زائد ممالک کے نامور ایتھلیٹس نے حصہ لیا تھا، جہاں نوح دستگیر بٹ نے فائنل راؤنڈ میں اپنے کوریائی حریف کو عبرتناک شکست دے کر پہلی پوزیشن حاصل کی۔ قومی ایتھلیٹ نے مقابلے کے دوران 14 کلوگرام وزنی تاریخی تلوار کو مسلسل ایک منٹ اور 49 سیکنڈز تک فضا میں تھامے رکھنے کا حیران کن ریکارڈ قائم کیا اور اسی شاندار کارنامے کی بدولت وہ سونے کے تمغے کے حقدار قرار پائے۔