چینی غذا سے مکمل نکال دینا معدے اور جسمانی صحت کیلئے مضر ہوسکتا ہے

چینی کے زیادہ استعمال کو اگرچہ صحت کیلئے نقصان دہ سمجھا جاتا ہے، لیکن ایک نئی تحقیق میں یہ بات سامنے آئی ہے کہ چینی کا مکمل ترک استعمال بھی جسم پر منفی اثرات مرتب کرسکتا ہے۔

طبی ماہرین کے مطابق اعتدال کے ساتھ چینی کا استعمال اور مکمل پرہیز کے درمیان توازن برقرار رکھنا صحت کیلئے زیادہ موزوں ثابت ہوسکتا ہے۔

تحقیق میں چوہوں کو دو مختلف غذائی گروپس میں تقسیم کیا گیا۔ ایک گروپ کو ایسی غذا فراہم کی گئی جس میں چینی بالکل شامل نہیں تھی، جبکہ دوسرے گروپ کی خوراک میں چینی موجود تھی۔ دونوں گروپس کا سولہ ہفتوں تک تفصیلی مشاہدہ کیا گیا۔

تحقیقی نتائج کے مطابق چینی سے مکمل محروم گروپ میں خون میں شکر کی سطح کو قابو میں رکھنے کی صلاحیت متاثر ہوئی، انسولین کے خلاف مزاحمت میں اضافہ دیکھنے میں آیا اور معدے کے مفید جراثیم کا قدرتی توازن بھی بگڑ گیا۔

اس کے علاوہ آنتوں میں سوزش کے آثار نمایاں ہوئے جبکہ جگر پر چربی جمع ہونے کا خطرہ بھی بڑھ گیا۔ محققین کا کہنا ہے کہ یہ نتائج اس بات کی نشاندہی کرتے ہیں کہ چینی کو مکمل طور پر غذا سے خارج کرنا معدے اور جسم کے توانائی پیدا کرنے والے نظام کیلئے نقصان دہ ہوسکتا ہے۔

ماہرین کے مطابق اس تحقیق سے حاصل ہونے والی معلومات آئندہ غذائی سفارشات اور صحت سے متعلق رہنما اصولوں کی تیاری میں اہم کردار ادا کرسکتی ہیں۔