امریکا نے ایران پر دوبارہ حملے شروع کر دیے، تہران سمیت مختلف شہروں میں دھماکے

امریکی سینٹرل کمانڈ نے اعلان کیا ہے کہ ایران میں متعدد اہداف پر حملے شروع کر دیے گئے ہیں۔ امریکی حکام کے مطابق یہ کارروائیاں ایران کی مبینہ مسلسل اور بلاجواز جارحیت کے جواب میں کی جا رہی ہیں۔

سینٹرل کمانڈ کا کہنا ہے کہ حملے امریکی صدر ڈونلڈ ٹرمپ کی ہدایات کے مطابق کیے جا رہے ہیں اور ایران میں مخصوص اہداف کو نشانہ بنایا جا رہا ہے۔

ایرانی خبر رساں اداروں کے مطابق دارالحکومت تہران اور جنوبی شہر بندر عباس میں دھماکوں کی آوازیں سنی گئی ہیں، جبکہ میناب، سیرک اور جزیرہ کیش سے بھی دھماکوں کی اطلاعات موصول ہوئی ہیں۔

دوسری جانب ایران کے صوبہ فارس اور مغربی تہران میں فضائی دفاعی نظام کو متحرک کر دیا گیا ہے۔ ایرانی حکام کی جانب سے فضائی نگرانی میں اضافہ کر دیا گیا ہے جبکہ صورتحال پر مسلسل نظر رکھی جا رہی ہے۔

امریکا اور ایران کے درمیان بڑھتی ہوئی کشیدگی کے باعث خطے میں تشویش کی لہر دوڑ گئی ہے اور عالمی برادری کی نظریں موجودہ صورتحال پر مرکوز ہیں۔