مودی سرکار گھبرا گئی، کاکروچ جنتا پارٹی کے تمام سوشل میڈیا اکاونٹ بند

بھارت میں سچ کی آواز اور عوامی تنقید کو دبانے کے لیے مودی حکومت نے ایک بار پھر اوچھے ہتھکنڈوں کا سہارا لیتے ہوئے نوجوانوں (Gen-Z) کی تیزی سے مقبول ہوتی ہوئی سیاسی طنزیہ تحریک ’کاکروچ جنتا پارٹی‘ کے تمام سوشل میڈیا اکاؤنٹس کو بلاک کر دیا ہے۔ مودی سرکار کی جانب سے یہ جابرانہ اقدام اس وقت اٹھایا گیا جب اس آن لائن مہم کو چند ہی دنوں میں کروڑوں افراد نے فالو کیا اور ہزاروں نوجوانوں نے اس میں باقاعدہ شمولیت اختیار کر لی۔

بھارتی جریدے ’دکن کرانیکل‘ کے مطابق، اس منفرد اور ابھرتی ہوئی تحریک کے بانی ابھیجیت دپکے نے تصدیق کی ہے کہ ہیکنگ اور حکومتی بندش کے باعث تنظیم اپنے تمام آفیشل سوشل میڈیا اکاؤنٹس تک رسائی کھو چکی ہے۔

رپورٹ کے مطابق ابھیجیت دپکے نے سوشل میڈیا پلیٹ فارم ’ایکس‘ (سابقہ ٹویٹر) پر اپنی ایک پوسٹ میں مودی انتظامیہ اور انتہا پسندوں کے ہتھکنڈوں کو بے نقاب کرتے ہوئے کہا:

• ان کا ذاتی انسٹاگرام اکاؤنٹ بھی سوچے سمجھے منصوبے کے تحت ہیک کر لیا گیا ہے۔

• نوجوانوں کو متحرک کرنے اور مودی حکومت کی نااہلی پر آواز اٹھانے کی پاداش میں انہیں مسلسل جان سے مارنے کی سنگین دھمکیاں دی جا رہی ہیں۔

’کاکروچ جنتا پارٹی‘ نے حالیہ دنوں میں بھارت کے تباہ حال تعلیمی نظام، امتحانات کے پیپرز وقت سے پہلے لیک ہونے (Paper Leaks) کے اسکینڈلز اور مودی کابینہ کی نااہلی کے خلاف ایک زبردست مہم شروع کر رکھی تھی۔ اس تحریک کے تحت بھارتی وزیرِ تعلیم دھرمیندر پردھان سے فوری استعفے کا مطالبہ کیا جا رہا تھا، جس نے مودی سرکار کو ہلا کر رکھ دیا۔