نیویارک میں 56 سالہ خاتون گاڑی سے اترتے ہی کھلے مین ہول میں گر کر جاں بحق

امریکی شہر نیویارک میں ایک افسوسناک حادثے میں 56 سالہ خاتون کھلے مین ہول میں گر کر جان کی بازی ہار گئیں۔

پولیس کے مطابق خاتون رات گئے اپنی گاڑی پارک کرکے جیسے ہی گاڑی سے باہر نکلیں تو وہ قریب ہی موجود کھلے مین ہول میں جاگریں جو تقریباً 10 فٹ سے زائد گہرا تھا۔

حادثے کے نتیجے میں خاتون شدید زخمی ہو کر بے ہوش ہو گئیں، جنہیں فوری طور پر ریسکیو اہلکاروں نے قریبی اسپتال منتقل کیا، تاہم وہ جانبر نہ ہو سکیں۔

ابتدائی معلومات کے مطابق خاتون کی گاڑی مرسیڈیز بینز ایس یو وی تھی۔ واقعے کے بعد متعلقہ اداروں نے تحقیقات شروع کر دی ہیں۔

بجلی اور گیس کمپنی نے اپنے بیان میں افسوس کا اظہار کرتے ہوئے کہا ہے کہ حادثے کے وقت علاقے میں کوئی تعمیراتی کام جاری نہیں تھا جبکہ مین ہول کا ڈھکن تقریباً 15 فٹ دور پایا گیا۔

نیویارک پولیس نے بھی واقعے کی مکمل تحقیقات شروع کر دی ہیں تاکہ یہ معلوم کیا جا سکے کہ حفاظتی انتظامات میں غفلت کیسے ہوئی۔