اسلام آباد میں پی ٹی آئی دھرنا ختم، پولیس سے مذاکرات کامیاب، ٹریفک بحال

اسلام آباد پولیس اور تحریک انصاف کے رہنماؤں کے درمیان سڑکیں کھولنے کے حوالے سے مذاکرات کامیاب ہو گئے ہیں، جس کے بعد 26 نمبر چونگی پر جاری دھرنا ختم کر دیا گیا۔

ذرائع کے مطابق علیمہ خان، نورین عظمیٰ خانم اور سہیل آفریدی سمیت دیگر رہنما اور کارکنان موٹر وے چوک سے واپس روانہ ہو گئے۔ احتجاج کے خاتمے کے بعد تمام بند راستے ٹریفک کے لیے کھول دیے گئے ہیں اور صورتحال مکمل طور پر معمول پر آ گئی ہے۔

پولیس کی بھاری نفری بھی مختلف مقامات سے واپس روانہ ہونا شروع ہو گئی ہے۔ اسلام آباد پولیس نے کئی گھنٹوں سے بند سڑکوں کو کھول دیا۔

قبل ازیں اسلام آباد پولیس نے 26 نمبر چونگی پر دھرنے پر بیٹھے کارکنان کو منتشر کیا تھا، جبکہ وزیراعلیٰ خیبر پختونخوا سہیل آفریدی اور بانی پی ٹی آئی کی بہنیں بھی موقع پر موجود تھیں۔

پولیس کے مطابق ایئرپورٹ سے آنے والا راستہ بھی بحال کر دیا گیا ہے۔