چیئرمین پی سی بی کو بھارت میں آئی سی سی بورڈ میٹنگ کا دعوت نامہ موصول

پاکستان کرکٹ بورڈ (پی سی بی) کے چیئرمین محسن نقوی کو بھارت میں ہونے والی انٹرنیشنل کرکٹ کونسل (آئی سی سی) کی اہم بورڈ میٹنگ اور انڈین پریمیئر لیگ (آئی پی ایل) کے فائنل میچ میں شرکت کا باضابطہ دعوت نامہ موصول ہو گیا ہے۔ تاہم، موجودہ پاک بھارت سیاسی و سفارتی تناظر کے باعث محسن نقوی کے بھارت جانے یا نہ جانے کا حتمی فیصلہ وزیراعظم شہباز شریف کریں گے۔

کرکٹ کی موقر ویب سائٹ کے مطابق، آئی سی سی کے اہم اجلاس رواں ماہ مئی میں دو مراحل میں منعقد ہوں گے۔ پہلے مرحلے میں آئی سی سی کی چیف ایگزیکٹیو کمیٹی کا ورچوئل (آن لائن) اجلاس 21 مئی کو ہوگا، جبکہ دوسرے مرحلے میں سب سے اہم بورڈ میٹنگ 30 اور 31 مئی کو بھارت کے شہر احمد آباد میں شیڈول ہے، جس میں شرکت کے لیے چیئرمین پی سی بی کو مدعو کیا گیا ہے۔

اس اہم آئی سی سی اجلاس کے ایجنڈے میں ورلڈ ٹیسٹ چیمپئن شپ (WTC) کے موجودہ فارمیٹ میں بڑی تبدیلیوں پر تفصیلی تبادلہ خیال کیا جائے گا۔ واضح رہے کہ موجودہ قوانین کے تحت چیمپئن شپ کا حصہ بننے کے لیے ہر دو ممالک کے درمیان سیریز میں کم از کم 2 ٹیسٹ میچز کھیلنا لازمی ہے۔ اس کے علاوہ، ٹیسٹ کرکٹ کو مزید وسعت دینے کے لیے ورلڈ ٹیسٹ چیمپئن شپ میں زمبابوے، آئرلینڈ اور افغانستان کی کرکٹ ٹیموں کو شامل کرنے کی تجویز پر بھی سنجیدگی سے غور کیا جائے گا۔ کرکٹ کے حلقے محسن نقوی کے ممکنہ دورۂ بھارت کو مستقبل کی پاک بھارت کرکٹ سیریز اور سفارت کاری کے لحاظ سے انتہائی اہمیت کا حامل قرار دے رہے ہیں۔