ایران کیخلاف جنگ کا کوئی جواز نہیں، بحری راستے جلد کھلنے چاہئیں: چین

چین کی وزارت خارجہ نے ایران اور امریکہ کے درمیان بڑھتی ہوئی کشیدگی پر شدید ردعمل ظاہر کرتے ہوئے کہا ہے کہ ایران کے خلاف جنگ شروع نہیں ہونی چاہیے تھی اور اس تنازع کو جاری رکھنے کا اب کوئی جواز باقی نہیں رہا۔ چینی وزارت خارجہ نے ایک جامع اور دیرپا جنگ بندی پر زور دیتے ہوئے کہا کہ مذاکرات اور رابطے کے چینلز کو فوری طور پر دوبارہ کھولنا وقت کی اہم ضرورت ہے، کیونکہ اس مسئلے کا حل نہ صرف فریقین بلکہ پورے خطے کے ممالک کے مفاد میں ہے۔بیجنگ حکومت نے واضح کیا ہے کہ ایران مسئلے کا فوجی حل کوئی راستہ نہیں ہو سکتا اور عالمی برادری کے مطالبے کے مطابق بحری راستوں کو جلد از جلد کھولا جانا چاہیے۔ چینی وزارت خارجہ کے مطابق، صدر شی جن پنگ اور امریکی صدر ڈونلڈ ٹرمپ کے درمیان متعدد اہم معاملات پر اتفاقِ رائے ہوا ہے اور چین نے ہمیشہ طاقت کے استعمال کے بجائے مکالمے اور مذاکراتی عمل کی حمایت کی ہے۔یہ بیانات ایک ایسے وقت میں سامنے آئے ہیں جب صدر ٹرمپ اور صدر شی جن پنگ کے درمیان ملاقات بیجنگ کے انتہائی محفوظ ترین مقام ‘ژونگ نان ہائی’ (Zhongnanhai) کمپلیکس میں جاری ہے۔ وائٹ ہاؤس کی میڈیا رپورٹ کے مطابق، اس ملاقات کی حساسیت کے پیشِ نظر صرف محدود تعداد میں صحافیوں کو داخلے کی اجازت دی گئی، جبکہ صدارتی قافلے کی آمد کے وقت سیکیورٹی کے غیر معمولی انتظامات کیے گئے اور سڑکیں خالی کروا دی گئی تھیں۔ بیجنگ کا کہنا ہے کہ وہ خطے میں ڈی اسکیلیشن کے لیے اپنا تعمیری کردار ادا کرتا رہے گا۔