صدر پاکستان کی جانب سے ملنے والا ہلال امتیاز میرے لیے اعزاز کی بات ہے، شاہد آفریدی

قومی کرکٹ ٹیم کے سابق کپتان اور مایہ ناز آل راؤنڈر شاہد خان آفریدی نے صدرِ پاکستان کی جانب سے ’ہلالِ امتیاز‘ ملنے پر اسے اپنی زندگی کا بڑا اعزاز قرار دیا ہے۔ ایوانِ صدر میں منعقدہ پُروقار تقریب میں صدر مملکت آصف علی زرداری نے شاہد آفریدی کو کرکٹ اور کھیل کے شعبے میں ان کی گراں قدر خدمات کے اعتراف میں اس اعلیٰ شہری اعزاز سے نوازا۔

سوشل میڈیا پلیٹ فارم ’ایکس‘ پر اپنی اہلیہ اور صاحبزادی کے ہمراہ تصاویر شیئر کرتے ہوئے شاہد آفریدی نے جذباتی پیغام میں لکھا کہ یہ اعزاز صرف ان کا نہیں بلکہ پوری پاکستانی قوم کا ہے، کیونکہ مداحوں کی محبت اور دعاؤں نے ہی انہیں اس مقام تک پہنچایا ہے۔ انہوں نے مزید کہا کہ وہ اپنا یہ ایوارڈ وطنِ عزیز کے ان شہداء کے نام کرتے ہیں جنہوں نے ملک کے دفاع کے لیے اپنی جانوں کے نذرانے پیش کیے۔ ان کا کہنا تھا کہ پاکستان کی خدمت ان کے لیے ہمیشہ اولین ترجیح رہے گی۔