کرکٹ آسٹریلیا نے دورہ پاکستان کیلئے سکواڈ کا اعلان کر دیا

کرکٹ آسٹریلیا نے پاکستان اور بنگلہ دیش کے اہم دوروں کے لیے اپنے قومی سکواڈ کا اعلان کر دیا ہے۔ آسٹریلوی ٹیم دورہ پاکستان کے دوران 3 ون ڈے میچز کی سیریز کھیلے گی، جس کے بعد وہ بنگلہ دیش کا رخ کرے گی جہاں 3 ون ڈے اور 3 ٹی ٹوئنٹی میچز شیڈول ہیں۔

پاکستان کے خلاف ون ڈے سیریز میں مچل مارش آسٹریلوی ٹیم کی قیادت کے فرائض سرانجام دیں گے۔ سکواڈ میں الیکس کیری، نیتھن ایلس، کیمرون گرین، جوش انگلس، میتھیو کہنیمن، مارنوس لبوشین، رائلی میریڈیتھ، اولی پیک، میتھیو رنشا، تنویر سانگھا، لیام اسکاٹ، میتھیو شارٹ، بلی اسٹینلیک اور ایڈم زمپا شامل ہیں۔

شیڈول کے مطابق پاکستان اور آسٹریلیا کے درمیان 3 ون ڈے میچز کی سیریز کا پہلا مقابلہ 30 مئی کو راولپنڈی میں ہوگا، جبکہ بقیہ دو میچز 2 اور 4 جون کو لاہور کے قذافی اسٹیڈیم میں کھیلے جائیں گے۔ اس سیریز کو دونوں ٹیموں کے لیے ورلڈ کپ کی تیاریوں کے حوالے سے انتہائی اہم قرار دیا جا رہا ہے۔