ایشین بیچ گیمز: پاکستان نے مجموعی طور پر 3 تمغے جیت لئے

چین کے شہر سانیا میں منعقدہ ایشین بیچ گیمز میں پاکستان نے مجموعی طور پر تین تمغے اپنے نام کر لیے ہیں، جن میں ریسلنگ کے دو چاندی (سلور) اور کبڈی کا ایک کانسی (برانز) کا تمغہ شامل ہے۔ ریسلنگ کے مقابلوں میں پاکستان کے اسد اللہ نے 80 کلو گرام کیٹیگری کے فائنل تک رسائی حاصل کی، تاہم انہیں ایرانی پہلوان سے شکست کے بعد سلور میڈل پر اکتفا کرنا پڑا۔ اسی طرح 90 کلو گرام کیٹیگری کے فائنل میں اسٹار پہلوان انعام بٹ کو بھی ایرانی حریف نے سخت مقابلے کے بعد چت کر دیا اور وہ سلور میڈل کے حقدار ٹھہرے۔ دوسری جانب 70 کلو گرام کیٹیگری میں برانز میڈل کے لیے ہونے والے مقابلے میں پاکستان کے محمد عبداللہ کو کرغزستان کے پہلوان کے ہاتھوں شکست کا سامنا کرنا پڑا۔