اقوام متحدہ میں کانفرنس: امریکا اور ایران کے درمیان تندو تیز جملوں کا تبادلہ

جوہری ہتھیاروں کے عدم پھیلاؤ (NPT) کے معاہدے کے جائزہ اجلاس کے آغاز پر ہی امریکا اور ایران کے درمیان تہران کے جوہری پروگرام کو لے کر تند و تیز جملوں کا تبادلہ ہوا ہے۔ تنازع کی اصل وجہ کانفرنس کے 34 نائب صدور میں ایران کا انتخاب ہے، جو غیر وابستہ تحریک (NAM) کے 121 ممالک کی جانب سے نامزد کیا گیا تھا۔ امریکی نمائندے نے ٹرمپ انتظامیہ کی جانب سے سخت حیرت کا اظہار کرتے ہوئے کہا کہ جو ملک اس معاہدے کی مسلسل خلاف ورزی کرتا رہا ہے، اسے نائب صدر بنانا سمجھ سے بالاتر ہے۔ آسٹریلیا، متحدہ عرب امارات اور یورپی طاقتوں نے امریکی موقف کی تائید کی، جبکہ روس نے ایران کو نشانہ بنانے کی مخالفت کی۔ دوسری جانب ویانا میں ایرانی سفیر رضا نجفی نے امریکی الزامات کو یکسر مسترد کرتے ہوئے انہیں بے بنیاد اور سیاسی ایجنڈے کا شاخسانہ قرار دیا ہے۔ چار ہفتوں پر محیط اس اجلاس میں فریقین کے درمیان یہ تناؤ مزید بڑھنے کا خدشہ ظاہر کیا جا رہا ہے۔