ایران نے 2 بحری جہازوں کو تحویل میں لینے کے امریکی اقدام کو مسلح ڈکیتی قرار دیدیا

ایران کی وزارتِ خارجہ نے دو تیل بردار بحری جہازوں، ‘ماجسٹک ایکس’ اور ‘ٹیفانی’ کو امریکی تحویل میں لیے جانے کے اقدام پر سخت احتجاج کرتے ہوئے اسے بین الاقوامی قوانین کی کھلی خلاف ورزی قرار دیا ہے۔ ترجمان وزارتِ خارجہ اسماعیل بقائی نے سماجی رابطے کی ویب سائٹ ایکس (ٹویٹر) پر جاری ایک بیان میں اس کارروائی کو ‘سرکاری قزاقی’ اور سمندروں میں مسلح ڈکیتی کو قانونی شکل دینے کی مذموم کوشش قرار دیا۔ انہوں نے طنزیہ انداز میں کہا کہ یہ اقدام دراصل پرانے دور کے قزاقوں کی واپسی ہے، بس فرق صرف اتنا ہے کہ اب وہ سرکاری اجازت ناموں اور ریاستی پرچم تلے اپنی لوٹ مار کو ‘قانون کے نفاذ’ کا نام دے رہے ہیں۔ واضح رہے کہ آبنائے ہرمز میں تجارتی جہازوں کی آمد و رفت کے معاملے پر امریکا اور ایران کے درمیان کشیدگی برقرار ہے اور دونوں ممالک کی افواج نے جہازوں کی تحویل کے حوالے سے ایک دوسرے کے متضاد بیانات جاری کیے ہیں۔