پاکستان کی معیشت بہتری کی جانب گامزن ہے: وزیر خزانہ محمد اورنگزیب

وفاقی وزیرِ خزانہ محمد اورنگزیب نے اسلام آباد میں پاکستان یورپی یونین بزنس فورم سے خطاب کرتے ہوئے کہا ہے کہ ملکی معیشت بہتری کی جانب گامزن ہے اور حکومت پائیدار ترقی کے لیے ڈھانچہ جاتی اصلاحات پر سختی سے عمل پیرا ہے۔ انہوں نے خوشخبری سنائی کہ مارچ میں کرنٹ اکاؤنٹ ایک ارب ڈالر سے زائد سرپلس رہا جبکہ ترسیلاتِ زر 3.8 ارب ڈالر تک پہنچ گئیں۔ وزیرِ خزانہ نے بتایا کہ مئی کے وسط میں 25 کروڑ ڈالر کا ‘پانڈا بانڈ’ جاری کرنے کا منصوبہ ہے اور جون کے اختتام تک ملکی زرمبادلہ ذخائر 18 ارب ڈالر تک پہنچ جائیں گے، جو تین ماہ کی درآمدات کے لیے کافی ہوں گے۔ ان کا مزید کہنا تھا کہ حکومت ڈیجیٹل معیشت کے فروغ اور ٹیرف اصلاحات پر توجہ دے رہی ہے، جس کے تحت خام مال اور درمیانی اشیاء پر ڈیوٹیز میں کمی لائی گئی ہے تاکہ برآمدات اور کاروباری سرگرمیوں کو سہارا مل سکے۔