روس پر یوکرینی ڈرونز کا حملہ، 186 یو اے ویز مار گرائے گئے، متعدد ہلاکتیں و زخمی

روسی وزارت دفاع کے مطابق یوکرین کی جانب سے روس کے مختلف علاقوں پر 186 ڈرونز کے ذریعے بڑے پیمانے پر حملہ کیا گیا، جسے روسی فضائی دفاعی نظام نے ناکام بناتے ہوئے تمام یو اے ویز (UAVs) کو مار گرایا۔ ان حملوں کے دوران کراسنودار ریجن میں واقع ایک آئل ریفائنری پر ڈرون کا ملبہ گرنے سے شدید آگ بھڑک اٹھی، جسے بجھانے کے لیے 100 سے زائد اہلکاروں نے حصہ لیا۔ جانی نقصان کے حوالے سے بیلگورود ریجن سب سے زیادہ متاثر ہوا جہاں مختلف حملوں میں 3 شہری ہلاک اور ایک 16 سالہ نوجوان سمیت متعدد افراد زخمی ہوئے۔ اس کے علاوہ بریانسک اور سیواستوپول میں بھی شہری آبادی اور گاڑیوں کو نشانہ بنایا گیا، جس کے بعد روسی حکام نے متاثرہ علاقوں میں سکیورٹی مزید سخت کر دی ہے۔