بجلی صارفین پر مزید بوجھ؛ قیمتوں میں 26 پیسے فی یونٹ اضافے کا امکان، نیپرا آج سماعت کرے گی

ملک بھر کے بجلی صارفین کے لیے بجلی کی قیمت میں 26 پیسے فی یونٹ اضافے کا امکان ہے۔ یہ اضافہ مارچ کی ماہانہ فیول پرائس ایڈجسٹمنٹ کی مد میں طلب کیا گیا ہے، جس پر نیپرا اتھارٹی سینٹرل پاور پرچیزنگ ایجنسی (CPPA) کی درخواست پر آج سماعت کرے گی۔ سی پی پی اے کے مطابق مارچ میں مجموعی طور پر 8 ارب 93 کروڑ 90 لاکھ یونٹس بجلی پیدا کی گئی، جس میں سے 8 ارب 64 کروڑ 40 لاکھ یونٹس ڈسکوز کو فراہم کیے گئے۔ اعداد و شمار کے مطابق مارچ کے لیے ریفرنس لاگت 7.99 روپے فی یونٹ مقرر تھی، جبکہ بجلی کی پیداوار میں پانی کا حصہ 23.55 فیصد، جوہری ایندھن 21.95 فیصد، مقامی کوئلہ 16.76 فیصد اور ایل این جی کا حصہ 5.64 فیصد رہا۔ واضح رہے کہ نیپرا کی منظوری کی صورت میں اس اضافے کا اطلاق کے الیکٹرک کے صارفین پر بھی ہوگا۔