آئی ایم ایف کا ایگزیکٹو بورڈ اجلاس 8 مئی کو طلب؛ پاکستان کے لیے 1.2 ارب ڈالر کی قسط کی منظوری متوقع

عالمی مالیاتی ادارے (آئی ایم ایف) نے اپنے ایگزیکٹو بورڈ کے اجلاسوں کا شیڈول جاری کر دیا ہے، جس میں پاکستان کے لیے قرض پروگرام کا ایجنڈا بھی شامل کیا گیا ہے۔ ذرائع کے مطابق، آئی ایم ایف کا ایگزیکٹو بورڈ 8 مئی کو ہونے والے اجلاس میں پاکستان کے لیے ایک ارب 20 کروڑ ڈالر کی اگلی قسط کی منظوری کا معاملہ دیکھے گا۔ پاکستان پہلے ہی عالمی ادارے کی تمام پیشگی شرائط پوری کر چکا ہے، جس کے باعث قرض پروگرام کے تحت تیسرے اقتصادی جائزے اور موسمیاتی تبدیلیوں سے نمٹنے کے لیے ‘آر ایس ایف’ پروگرام کے دوسرے جائزے کی منظوری بھی متوقع ہے۔ واضح رہے کہ پاکستان اور آئی ایم ایف کے درمیان اسٹاف لیول معاہدہ رواں برس 27 مارچ کو طے پایا تھا، جس کے بعد اب حتمی منظوری کے لیے معاملہ بورڈ کے سامنے رکھا جا رہا ہے۔