پی ایس ایل 11، پشاورزلمی نے کراچی کنگزکو7وکٹوں سے ہرادیا، زلمی کے علی رضا کی ہیٹ ٹرک

پاکستان سپر لیگ الیون میں  پشاور زلمی  نے کراچی کنگز کو با آسانی 7 وکٹوں سے ہرادیا۔لاہور کے قذافی اسٹیڈیم میں کھیلے گئے میچ میں کراچی کنگز نے ٹاس جیت کر پہلے بیٹنگ کرنے کا فیصلہ کیا۔

کراچی کنگز نے مقررہ 20 اوورز میں 9 وکٹوں پر 182 رنز اسکور کیے۔ جیسن روئے 85 رنز کے ساتھ نمایاں رہے۔اعظم خان نے 35 رنز اسکور کیے۔پشاور زلمی کے فاسٹ بولر علی رضا نے اننگز کی آخری 3 گیندوں پر ہیٹ ٹرک مکمل کی اور مجموعی طور پر میچ میں 4 وکٹیں حاصل کیں۔ محمد باسط، افتخار احمد، سفیان مقیم اور ایرون ہارڈی نے ایک ایک وکٹ حاصل کی۔

پشاور زلمی نے کوشال مینڈس کی شاندار بیٹنگ کی بدولت 183 رنز کا ہدف 19 ویں اوور میں 3 وکٹوں کے نقصان پر حاصل  کرلیا۔ مینڈس 80 اور فرحان یوسف 58 رنز بنا کر ناقابل شکست رہے۔

پشاور زلمی نے ایونٹ میں 8 ویں  کامیابی حاصل کرتے ہوئے پوائنٹس ٹیبل پر اپنی پہلی پوزیشن برقرار رکھی۔پشاور زلمی ایونٹ میں اب تک ناقابل شکست ہے، وہ  9 میچز میں 17 پوائنٹس کے ساتھ پہلی پوزیشن پر ہے۔ ایک میچ بارش کی نذر ہوا تھا۔دوسری جانب کراچی کنگز 8 میچز میں 6 پوائنٹس کے ساتھ ساتویں نمبر پر ہے۔