ٹائٹینک کے زندہ بچنے والے شخص کی لائف جیکٹ پونے 7 لاکھ پاؤنڈ میں نیلام

تاریخی بحری جہاز ٹائٹینک کی یادگار اشیا کی حالیہ نیلامی نے دنیا بھر کے مجموعہ کاروں (Collectors) کو حیران کر دیا ہے، جہاں جہاز ڈوبنے کے دوران بچ جانے والی ایک خاتون کی لائف جیکٹ ریکارڈ توڑ 6 لاکھ 70 ہزار پاؤنڈ (تقریباً 23 کروڑ پاکستانی روپے سے زائد) میں فروخت ہو گئی۔ یہ جیکٹ فرسٹ کلاس مسافر لورا میبل فرانکاٹیلی نے استعمال کی تھی اور اس کی خاص بات اس پر موجود وہ دستخط ہیں جو انہوں نے دیگر 8 زندہ بچ جانے والے افراد کے ساتھ مل کر ثبت کیے تھے، جن میں جہاز کے عملے کے ارکان بھی شامل تھے۔

ولٹ شائر کے نیلام گھر ‘ہینری الریڈج اینڈ سن’ میں ہونے والی اس نیلامی میں ٹائٹینک سے وابستہ کل 344 اشیا پیش کی گئیں، جن میں ایک امیر تاجر کی گھڑی اور لائف بوٹ کا کشن بھی شامل تھا، جو بالترتیب ایک لاکھ 80 ہزار اور تین لاکھ 90 ہزار پاؤنڈ میں فروخت ہوئے۔ نیلام گھر کے مینیجنگ ڈائریکٹر اینڈریو آلڈرج کا کہنا ہے کہ ان اشیا کی غیر معمولی قیمتیں اس بات کا ثبوت ہیں کہ 1912 کے اس سانحے اور اس کے مسافروں کی داستانوں میں لوگوں کی دلچسپی آج بھی برقرار ہے۔