پاک مصر مشق ’تھنڈر II‘ کامیابی سے مکمل، انسداد دہشتگردی تعاون مزید مضبوط

پاکستان اور مصر کی افواج کے درمیان انسدادِ دہشت گردی پر مبنی دو ہفتوں پر محیط مشترکہ فوجی مشق ’تھنڈر II‘ خیبر پختونخوا کے علاقے چراٹ میں کامیابی کے ساتھ اختتام پذیر ہو گئی ہے۔ آئی ایس پی آر (ISPR) کے مطابق، اس مشق کا بنیادی مقصد دونوں ممالک کی افواج کے درمیان پیشہ ورانہ مہارتوں کا تبادلہ، آپریشنل تکنیکوں کی بہتری اور باہمی ہم آہنگی کو فروغ دینا تھا۔ اس اہم عسکری سرگرمی میں پاک فوج کے سپیشل سروسز گروپ (SSG) اور مصری سپیشل فورسز کے دستوں نے حصہ لیا، جہاں جدید جنگی حکمتِ عملی اور انسدادِ دہشت گردی کے پیچیدہ آپریشنز کی مشترکہ تربیت کی گئی۔

مشق کی اختتامی تقریب میں سپیشل سروسز گروپ کے جنرل آفیسر کمانڈنگ نے بطور مہمانِ خصوصی شرکت کی، جبکہ مصری وفد کی قیادت پیراٹروپرز کے کمانڈر میجر جنرل محمد سعد عبدالرازق نے کی۔ اس موقع پر مصری دفاعی اتاشی بھی موجود تھے۔ حکام کا کہنا ہے کہ ’تھنڈر II‘ کی کامیاب تکمیل دونوں برادر اسلامی ممالک کے درمیان دیرینہ فوجی تعلقات اور دفاعی تعاون کو مزید مستحکم کرنے میں ایک اہم سنگِ میل ثابت ہوگی۔