روئی کی قیمتوں میں بڑا اضافہ، فی من نرخ 20 ہزار 500 روپے کی سطح پر پہنچ گئے

ملک میں روئی کی قیمتوں میں نمایاں اضافہ ریکارڈ کیا گیا ہے، جس کے بعد فی من روئی کی قیمت بڑھ کر 20 ہزار 500 روپے تک پہنچ گئی ہے، جو گزشتہ دو برس کی بلند ترین سطح قرار دی جا رہی ہے۔

ماہرین کے مطابق خلیجی خطے میں کشیدگی اور امریکا ایران مذاکرات کسی معاہدے کے بغیر ختم ہونے کے باعث روئی کی درآمدی سرگرمیاں بحال نہ ہو سکیں، جس کے نتیجے میں مقامی مارکیٹ میں قیمتوں میں تیزی دیکھنے میں آئی۔

چیئرمین کاٹن جنرز فورم احسان الحق کے مطابق گزشتہ چھ ہفتوں کے دوران روئی کی قیمت میں تقریباً 4 ہزار روپے فی من اضافہ ہوا ہے۔ انہوں نے کہا کہ درآمدات کی معطلی، معیاری روئی کی محدود دستیابی اور پولیسٹر فائبر کی قیمتوں میں اضافے نے مارکیٹ پر دباؤ بڑھایا۔

انہوں نے بتایا کہ سندھ کے علاقوں ٹنڈو باگو اور ڈگری میں کپاس کے ایڈوانس سودے بھی بلند نرخوں پر طے پائے، جبکہ سانگھڑ میں ایک جننگ فیکٹری نے روئی کی 200 گانٹھوں کا سودا 21 ہزار 700 روپے فی من کے حساب سے کیا۔

احسان الحق کے مطابق قیمتوں میں اضافے کے باعث رواں سال کپاس کی کاشت میں نمایاں اضافہ متوقع ہے، کیونکہ کسان بہتر نرخوں کی وجہ سے اس فصل کی جانب راغب ہو رہے ہیں۔

اعداد و شمار کے مطابق کاٹن ایئر 2025-26 کے دوران پاکستان میں کپاس کی پیداوار 56 لاکھ گانٹھ رہی، جبکہ ایک امریکی زرعی ادارے نے اپنی حالیہ رپورٹ میں پیداوار کا تخمینہ بڑھا کر 72 لاکھ 21 ہزار گانٹھ کر دیا ہے۔